Gen 6 | NdeIBE | STEP | Kwathi abantu sebesanda ngobunengi emhlabeni, bezala amadodakazi,

Genesis 6

Uzamcolo

1 Kwathi abantu sebesanda ngobunengi emhlabeni, bezala amadodakazi,

2 amadodana kaNkulunkulu abona ukuthi amadodakazi abantu ayemahle, bazikhethela abawafunayo bawathatha. 3 Kwathi uJehova wasesithi, “UMoya wami kawuyikuphikisana lomuntu ngokungapheliyo, ngoba yena ngowenyama nje; izinsuku zakhe zizakuba likhulu elilamatshumi amabili kuphela.”

4 AmaNefilimi ayesemhlabeni ngalezozinsuku – njalo langemuva – lapho amadodana kaNkulunkulu angenela amadodakazi abantu azala lawo abantwana. Ayengamaqhawe ekadeni, amadoda endumela.

5 UNkulunkulu wabona ukuthi ukuxhwala kwabantu kwasekukukhulu kanganani emhlabeni, njalo lokuthi zonke izinkanuko zeminakano yezinhliziyo zabo zaziyibubi kuphela sonke isikhathi. 6 UJehova wadabuka ngokuthi wayemenzile umuntu emhlabeni, ngakho inhliziyo yakhe yagcwala ubuhlungu.

7 Ngakho uJehova wasesithi, “Umuntu engamenzayo ngizamkhucula emhlabeni – abantu lezinyamazana, lezinanakazana ezihuquzela emhlabathini, lezinyoni zemoyeni – ngoba kuyangidabukisa ukuthi ngabenza.”

8 Kodwa uNowa wathola umusa emehlweni kaNkulunkulu.

9 Lo ngumlando kaNowa: UNowa wayeyindoda elungileyo, engelasici phakathi kwabantu ngalesosikhathi, njalo wabambelela kuNkulunkulu. 10 UNowa wayelamadodana amathathu: UShemu, loHamu loJafethi.

11 Umhlaba wawuxhwalile phambi kukaNkulunkulu njalo ugcwele ubudlwangudlwangu.

12 UNkulunkulu wabona ukuthi umhlaba wawusuxhwale njani, ngoba bonke abantu emhlabeni basebelezindlela zabo ezixhwalileyo. 13 Yikho uNkulunkulu wasesithi kuNowa, “Ngizabatshabalalisa bonke abantu, ngoba umhlaba ugcwele ubudlwangudlwangu ngenxa yabo. Ngeqiniso ngizababhubhisa bona kanye lomhlaba. 14 Ngakho zakhele umkhumbi ngezigodo zesihlahla sokubaza; wenze amakamelo kuwo, uwuhuqe ngenhlaka ngaphakathi langaphandle. 15 Uzawakha kanje: Umkhumbi kawube ngamalunga engalo angamakhulu amane lamatshumi amane lanhlanu ukuphakama. 16 Wenzele uphahla uwuphethe umkhumbi sekusilela ingxenye yelunga lengalo ukufika phezulu. Faka umnyango eceleni komkhumbi njalo wenze isigcawu saphansi, lesaphakathi kanye lesaphezulu. 17 Ngizathumela uzamcolo wamanzi emhlabeni ukubhubhisa konke okuphilayo ngaphansi kwezulu, zonke izidalwa eziphefumulayo. Yonke into emhlabeni izabhubha. 18 Kodwa ngizabopha isivumelwano lawe, njalo wena uzangena emkhunjini – wena lamadodana akho lomkakho kanye labomalokazana bakho babe lawe.

19 Uzamele ulethe emkhunjini okubili kwezidalwa zonke eziphilayo, okuduna lokusikazi, uzigcine ziphila zikanye lawe.

20 Okubili kwemihlobo yonke yezinyoni, okwemihlobo yonke yezinyamazana lokwezinanakazana zonke ezihuquzela emhlabathini zizakuza kuwe zizogcinwa ziphila.

21 Kumele uthathe yonke imihlobo yokudla okuzadliwa, ukulondolozele wena kanye lazo.”

22 UNowa wakwenza konke njengokulaywa kwakhe nguNkulunkulu.